Мудрэн Беслъэн и Кубокыр Налшык къашэ

СССР-м щIыхь зиIэ и тренер Куэблэ Екъуб и цIэр зэрихьэу Адыгейм и къалащхьэ Мейкъуапэ дэт спорт уардэунэм иджыблагъэ щекIуэкIащ дзюдомкIэ Континент лигэм хыхьэ «Кавказ» дивизионым хэт командэхэм я гуп зэпеуэ. Ар хуэунэтIауэ щытащ Олимп джэгухэм я чемпион Мудрэн Беслъан и цIэкIэ ягъэува Кубокыр къэхьыным. Ахъшэ саугъэту абы щагъэджэгуащ псори зэхэту сом мелуан 12,6-рэ.

Зэхьэзэхуэм «блынджабэр-блынджабэм» жыхуаIэм хуэдэу щызэпэщIэуващ Грознэм и «Ахъмэт», «Эдельвейс», Баку и «Кано», Назрань и «Чингас», Налшык и «Локомотив - Грин-Хилл», Каспийск и «Вудглейд», Сочэ и «Жемчужина» клубхэр, Мейкъуапэ дзюдомкIэ и школыр, псори зэхэту командибл.

ЗэIущIэхэр зэрырагъажьэу Къэбэрдей-Балъкъэрым и «Локомотив - Грин-Хилл»-м бжьыпэр иубыдри, къыпэщIэта гупхэр тригъэкIуэтурэ кIэух зэпеуэм щыIущIащ «Кавказ» дивизионым нэгъабэ япэ щыхъуа Грознэм и «Ахъмэт» гупым икIи зэхьэзэхуэм и бжыгъэр 3:2-уэ абы къыфIихьащ.

Апхуэдэ щIыкIэкIэ финалым щызэхуэза ди клубымрэ Шэшэным еймрэ Iэмал ягъуэтащ Континент лигэм и суперфиналым икIыну. Абы ахэр щаIущIэнущ «Центр», «КъуэкIыпIэ», «Динамо» дивизионхэм япэ, етIуанэ увыпIэхэр къыщызыхьахэм.

КъБР-м и «Локомотив - Грин-Хилл»-м и тренерыр Джэданэ Залымщ.