«Тэрчым» и топджэгухэр ягъэлъапIэ

Тэрч къалэ администрацэм иджыблагъэ щагъэлъэпIащ «Тэрч» топджэгу командэм хэтхэмрэ тренерхэмрэ, мы гъэм ахэр зыхэта зэIущIэхэм щаIа ехъулIэныгъэхэм щхьэкIэ.

Псалъэм къыдэкIуэу, Тэрч щIыналъэм и командэ нэхъыщхьэ клубым Къэбэрдей-Балъкъэрым футболымкIэ и чемпионатми, КъБР-м и Iэтащхьэм и Кубокыр къэхьыным хуэунэтIауэ екIуэкIа зэхьэзэхуэми етIуанэ увыпIэхэр къыщихьащ. Командэм и тренерыр Бэлэтокъуэ Маратщ.

Ветеранхэм я командэр республикэм и чемпионатым ещанэ щыхъуащ, я тренерыр Щамей Казбекщ.

 «Тэрчым» ныбжьыщIэхэр зыхэт и командэм КъБР-м и чемпионатым япэ увыпIэр къыщихьащ. Ахэр зыгъасэр Къумыкъу Рэмэзанщ.

Тэрч щIыналъэ администрацэм и унафэщI Хъущт Аслъэнбий топджэгухэмрэ тренерхэмрэ щIыхь тхылъхэмрэ ахъшэ саугъэтхэмрэ яритащ. Апхуэдэуи гулъытэ яхуищIащ мы гъэм Геленджик щекIуэкIа «Бжьыхьэ кубок ImSport 2024» урысейпсо зэхьэзэхуэм щытекIуа ныбжьыщIэхэми: етIанэгъэ екIуэкIыну зэIущIэхэм зэрыхэтын спорт фащэщIэхэр тыгъэ хуащIащ.

«Тэрч» футбол командэм и президент Болэ Аслъэни тренерхэм щхьэхуэу яхуэупсащ ахъшэ саугъэтхэмкIэ.

Хъущт Аслъэнбий топджэгухэмрэ тренерхэмрэ фIыщIэ яхуищIащ футбол дахэ къызэрагъэлъэгъуам, щIыналъэм и щIыхьыр лъагэу зэраIэтам папщIэ.

«Ди къалэн нэхъыщхьэу щытыр мы спорт лIэужьыгъуэ цIэрыIуэм ди сабийхэмрэ щIалэгъуалэмрэ нэхъыбэу дедгъэхьэхынырщ», - къыхигъэщащ администрацэм и унафэщIым.