Дэ Урысейм дрицIыхущ

Хэкум и хъумакIуэм и махуэм и щIыхькIэ Бахъсэн къалэ округым Iуэху дахэ ще­кIуэкIащ. «Пэрытхэм я зэщIэхъееныгъэ» ­зэгухьэныгъэм районым щыIэ и къудамэм хэтхэм ящыщу зи ныбжьыр илъэс 14 ири­къуахэм иратыжащ къэралым и дэфтэр нэхъыщхьэр - УФ-м и паспортыр. Ар къызэрагъэпэщащ «Дэ Урысейм дрицIыхущ» къы­хуеджэныгъэм щIэту. БалигъыпIэ иувахэм пас­портхэр щратыжа зэIущIэм зыкърагъэхьэлIащ Бахъсэн къалэ округым и администрацэм, егъэджэныгъэмкIэ департаментым я лэжьакIуэхэм, егъэджакIуэхэм, адэ-анэхэм, журналистхэм. 
Урысей Федерацэмрэ Къэ­бэрдей-Балъкъэрымрэ я гимнхэмкIэ зэIущIэр къызэ­Iуаха нэужь, Бахъсэн къалэ округым и администрацэм и унафэщI Мамхэгъ Хьэчим ныбжьыщIэхэм псалъэ гуа­пэкIэ захуигъэзащ.
- Хэкум и хъумакIуэхэм я ­махуэр ди къэралым и махуэшхуэ нэхъ лъапIэ дыдэхэм ящыщщ. Ар хухэхащ лIыхъужь нэсхэм, ди къэралым и щIыхьыр хахуэу зыхъумахэм, мы зэманым зыхъумэхэм. Сы­хуейщ ди щIэблэ дахэм щапхъэ фхуэхъуну къэралым и щхьэхуитыныгъэр зыгъэнэ­хъапэхэр, абыхэм я лIыхъу­жьыгъэм пщIэ хуэфщIыну, фэри къэралым сэбэп фыхуэхъун зэрыхуейр къывгурыIуэу фыкъыдэкIуэтеину, - жиIащ абы. 
Мамхэгъ Хьэчим дэфтэр нэхъыщхьэр яритыжащ «Пэрытхэм я зэщIэхъееныгъэм» жы­джэру хэт ныбжьыщIэ 50-м щIигъум. Паспортыр зрата ныбжьыщIэхэм ехъулIэныгъэ­хэр къыщагъэлъагъуэ еджэнми спортми.