МинитIым щIигъу зэхуэсат

«Лъэпкъхэм я Кубок» фIэщыгъэр зэрихьэу каратэ-кекусинкай лIэужьыгъуэмкIэ дунейпсо зэхьэзэхуэ Мэзкуу къалэм щекIуэкIащ. Илъэс етIуанэ хъуауэ ар къызэрегъэпэщ Подольск къалэм и «Подольск-Додзё» спорт клубым, промышленникхэмрэ хьэрычэтыщIэхэмрэ я «Иволга» зэгухьэныгъэр къадэIэпыкъуу.

Иджырей зэIущIэр щызэхэтащ «Лужники» щIыпIэм щыIэ Винер-Усмановэ Иринэ и уардэунэм. Абы щызэпеуащ УФ-м и щIыналъэхэм ящыщу 41-мрэ хамэ къэралу 27-мрэ я спортсмену 2000-м щIигъу.

Къэбэрдей-Балъкъэрым и щIыхьыр яIэту зэхьэзэхуэм цIыху 15 хэтащ икIи абыхэм ящыщу 4-м медаль зэхуэмыдэхэр къахьащ. И хьэлъагъ елъытауэ щызэуа гупым я деж Романенкэ Максим зэIущIищ щригъэкIуэкIати, щыми щытекIуэри, япэ увыпIэр иубыдащ икIи УФ-м спортымкIэ и мастерым и кандидат дамыгъэр къыхуагъэфэщащ.

ЗэIущIиплI иригъэкIуэкIа нэужь дыжьын медаль къихьащ Жолаев Даниял. КIэух зэIущIэр ди лъахэгъум фIихьащ европей чемпионатхэм тIэу щытекIуа и хьэрхуэрэгъум. Жолаевым мы зэхьэзэхуэм щигъэзэщIащ УФ-м спортымкIэ и мастерым и мардэр.

Дэгужьий Астемыр домбеякъ медалыр къихьын папщIэ зэIущIитху иригъэкIуэкIащ. Ещанэ увыпIэр къихьащ Къардэн Беслъэни, ауэ абы къыпэщылъар зэIущIищщ.

Ди спортсменхэр зэхьэзэхуэм хуагъэхьэзыращ Къармэ Iэмурбэчрэ Мэршэнкъул Къантемыррэ.