ТекIуэныгъэ Иным и щIыхькIэ

Мы гъэм къэралым и дэнэ щIыпIи къыщызэрагъэпэщ  ТекIуэныгъэ Иныр илъэс 80 зэрырикъум хуэгъэпса зэпеуэ, зэIущIэ зэмылIэужьыгъуэхэр. Абыхэм ящыщ зыуэ щытащ «Динамо» спорт зэгухьэныгъэм боксымкIэ и урысейпсо зэхьэзэхуэу Налшык къалэм щекIуэкIар. Абы хэтащ Урысейм и щIыналъэхэм ящыщу 18-м я спортсмени 170-м нэблагъэ, я ныбжькIэ илъэс 15 - 16 хъухэу.

МахуитхукIэ екIуэкIа зэпеуэхэм хэтащ Къэбэрдей-Балъкъэрым и боксер ныбжьыщIэу 32-рэ икIи ехъулIэныгъэ хъарзынэхэр щызыIэрагъэхьащ. Псори зэхэту медали 8 абыхэм къахьащ, 6-р дыщэу.

Я хьэлъагъ елъытауэ щызэуа гупхэм япэ увыпIэхэр щаубыдащ Ахъуэбэч Iиляс (кг 46-рэ), Быф Дамир (кг 48-рэ), Пщынокъуэ Ислъам (кг 50), Динаев Билал (кг 54-рэ), Батыр Ренат (кг 57-рэ), Байзуллаев Жамболэт (кг 63-рэ) сымэ. Дыжьын медалхэр къахьащ Къашыргъэ Имранрэ (кг 50), Аршиев Аслъэнрэ (кг 57-рэ).

Зэхьэзэхуэм щытекIуахэр хэтынущ Урысей Федерацэм боксымкIэ пашэныгъэр къыщыхьыным хуэунэтIауэ мы гъэм мэлыжьыхьым и 2 - 12-хэм Владимир областым и Суздаль къалэм щызэхашэну зэпеуэм.

КъБР-м и командэр зэIущIэм хуагъэхьэзыращ Чочаев Расул, Къумыкъу Мухьэмэд, Куэшмэн Аслъэн, Елгъэр Елдар, КIэрэф Аслъэн, Хаджиев Марат, Гелястанов Марат, Хаджиев Малик сымэ.