Джыджиймрэ Жыласэмрэ я медалхэр

БэнэкIэ хуит

Калининград къалэм дэт «ЩIалэгъуэ» спорт уардэунэм щекIуэкIащ УФ-м спортымкIэ щIыхь зиIэ и мастер Шумилин Андрей и фэеплъ 27-нэ дунейпсо зэхьэзэхуэ. Хэгъэрейхэм нэмыщI, абы хэтащ Белоруссием, Молдовэм, Алыджым, Ленинград, Мэзкуу, Оренбург, Кемеровэ областхэм, Дагъыстэным, Къэрэшей-Шэрджэсым, Къэбэрдей-Балъкъэрым, Коми республикэм, Санкт-Петербург, Мэзкуу къалэхэм я спортсменхэр, УФ-м и командэ къыхэхам хэтхэр - псори цIыху 200-м щIигъу, я ныбжькIэ илъэс 24-м щIимыгъуауэ. 
Ди гуапэ зэрыхъущи, Къэбэрдей-Балъкъэрым и лIыкIуэ, килограмм 92-рэ зи хьэлъагъхэм я деж щыбанэ Джыджий Темырлан зэхьэзэхуэм япэ увыпIэр къыщихьащ. КIэух зэIущIэм ди щIалэм къыпэщIэтащ Къэрэшей-Шэрджэсым и бэнакIуэ лъэщ Долаев Рустам. 
Апхуэдэ ехъулIэныгъэ зригъэгъуэтыным зымащIэщ хуримыкъуар Жыласэ Рустами. Дыщэ медалым нэсыным зы лъэбакъуэ иIэжу япэ увыпIэр абы IэщIихащ Дагъыстэным и спортсмен Магомедов Хъалид. ЩIалэхэр щыбанэр килограмм 61-рэ хъухэр зыхэтырщ. 
Фигу къэдгъэкIыжынщи, Шумилин Андрей США-м и Атлантэ къалэм щекIуэкIа Олимп джэгухэм ещанэ щыхъуащ, Европей чемпионатым щытекIуащ, Дунейпсо кубокыр щэнейрэ къихьащ, «Игры Доброй воли», «Всемирные Игры военнослужащих» дунейпсо зэхьэзэхуэхэм япэ увыпIэхэр щиубыдащ. И ныбжьыр илъэс 53-рэ фIэкIа мыхъуауэ дунейм ехыжащ куэдрэ сымэджа нэужь. Спортсмен цIэрыIуэм и фэеплъ мы махуэхэм щагъэуващ Калининград къалэм Олимп джэгухэм хэтыфыну зэчий зыбгъэдэлъу къалъытэ ныбжьыщIэхэр щагъэхьэзыр и спорт еджапIэм и пщIантIэм.