Урысей Федерацэм мас-рестлингымкIэ пашэныгъэр къыщыхьыным хуэунэтIа зэхьэзэхуэ Налшык къалэм и «Гладиатор» спорт комплексым махуиплIкIэ щекIуэкIащ. Абы щызэпеуащ ди къэралым и щIыналъэхэм ящыщу 30-м щIигъум я спортсмен, щIалэхэри хъыджэбзхэри зэгъусэу, 400-м щIигъу, я ныбжькIи гупиплIу гуэшауэ.
Судьяхэм я коллегием (арбитрхэр 30 хъухэрт) и тхьэмадэу щытащ урысейпсо категорие зиIэ судья, КъБР-м Мас-рестлингымкIэ и федерацэм и унафэщI Гъубж БетIал.
ЗэIущIэр къыщызэIуахым щыIащ КъБР-м и Парламентым ЕгъэджэныгъэмкIэ, щIэныгъэмкIэ, физкультурэмкIэ, спортымрэ щIалэгъуалэм я IуэхухэмкIэ и комитетым и унафэщI Емуз Нинэ, КъБР-м спортымкIэ и министрым и къуэдзэ Хэжь Заур, УФ-м Мас-рестлингымкIэ и федерацэм и президент Сивцев Иван, УФ-м и студентхэм спортымкIэ я зэгухьэныгъэм и гъэзэщIакIуэ комитетым хэт Черкашин Александр сымэ.
Къэбэрдей-Балъкъэрым къыбгъэдэкIыу зэIущIэм хэтащ цIыху 65-рэ икIи медаль зэхуэмыдэу 14 къахьащ.
И хьэлъагъ елъытауэ зыхэта гупхэм я деж япэ щыхъуащ УФ-м и чемпион ЩоджэнцIыкIу Адалинэ. Дыжьын медалхэр къахьащ Баллиев Расул, Ажахъуэ Амир, Мэкъуауэ Силинэ, Маммеев Даниял, АфэщIыж Ричард, ГъукIэлI Идар сымэ.
Нэгъуей Аслъэнджэрий, Къармокъуэ Даянэ, Чылар Елдар, Уэщхъун Iэдэм, Щоджэн ФатIимэ, Ало Андемыр, Кхъуэныхь Темболэт сымэ ещанэ хъуащ.
«Республикэм дежкIэ мыр рекордщ. Мас-рестлингымкIэ ди федерацэр щедгъэтха 2015 гъэм щегъэжьауэ мыпхуэдэ зэхьэзэхуэхэр еплIанэу ди деж щыдогъэкIуэкI: 2017 гъэм УФ-м пашэныгъэр къыщыхьыным хуэунэтIа зэпеуэ, 2018, 2020 гъэхэм - чемпионатхэр, мы гъэм аргуэру бжьыпэм щыщIэбэна зэхьэзэхуэ Налшык щызэхэтшащ. ИлъэсипщIым къриубыдэу зэхьэзэхуэшхуиплI ди щIыналъэм къызэрыратам къегъэлъагъуэ зэфIэкIыфIхэр зэрыдиIэр», - жиIащ Гъубж БетIал.
Зэхьэзэхуэм щытекIуахэр хэтынущ дуней псом мас-рестлингымкIэ пашэныгъэр къыщыхьыным хуэунэтIауэ мы гъэм Монголием щекIуэкIыну зэпеуэм.
