Ди гуапэ зэрыхъущи, республикэм и щIалэгъуалэм мымащIэу яхэтщ ябгъэдэлъ лъэпкъ гъэсэныгъэ екIум къыдэкIуэу, щIэныгъэ нэсым и нэхум хуеIэхэр, лъагапIэщIэхэр зи плъапIэхэр. Зи дуней еплъыкIэрэ акъылрэ зэрыубыдауэ къэплъытэ хъуну апхуэдэ ныбжьыщIэхэм ящыщщ Бахъсэненкэ (Къэсейхьэблэ) къуажэм дэт курыт школ №1-м (унафэщIыр Зэрыкъуш Вадимщ) и 10-нэ классым щеджэ Нартокъуэ Ренат.
Зи мурадхэр ин, хъуэпсапIэхэр жыжьэ нэс щIалэщIэм и цIэр фIыкIэ куэдрэ къоIу. Ренат щIэх-щIэхыурэ хэтщ курыт школым щадж предмет зэмылIэужьыгъуэхэмкIэ екIуэкI зэпеуэ-хэм, олимпиадэхэм, абыхэм увыпIэфIхэр къыщехь.
Иджыблагъэ Ренат хэтащ химиемкIэ екIуэкIа школ олимпиадэм. ЩIалэ акъылыфIэр пашэ щыхъуащ абы и щIыпIэ, щIыналъэ Iыхьэхэм. Ар ящыщащ Кавказ Ищхъэрэ федеральнэ щIыналъэм и пщIэр къэралпсо утыкум щызыхъумахэм. Олимпиадэм и иужьрей зэпеуэр къыщызэрагъэпэщат Ямало-Ненецкэ автоном округым хыхьэ Новый Уренгой къалэм. А щIыпIэ жыжьэм щIалэщIэм и гъусэу кIуащ школым и унафэщIри, еджапIэм и гъэсэн щIалэ Iущым и ехъулIэныгъэм иригушхуэу, ар зыхэтыну зэпеуэхэм нэхъри тригъэгушхуэу. Ренат зэрыжиIэжымкIэ, япэщIыкIэ ныбжьыщIэхэр хэтащ Арктическэ лицейм химием и теориемкIэ щекIуэкIа зэпеуэм. ИужькIэ практикэ лэжьыгъэхэр ягъэзэщIащ. А псоми ехъулIэныгъэ иIэу пхыкIащ адыгэ щIалэщIэр икIи олимпиадэ цIэрыIуэм зэрыхэтамкIэ сертификатхэр, щIыхь тхылъхэмрэ саугъэт цIэрыIуэхэмрэ и тыгъэу щалъхуа щIыналъэм къэкIуэжащ.
Ренат апхуэдэу гукъинэж щыхъуащ школакIуэхэр зрагъэблэгъа щIэныгъэ, щэнхабзэ зэхыхьэхэр, нэгузегъэужь Iуэхухэр. Абыхэм ящыщт «Ямалым и псэ», «Аркториум» лъэпкъ паркхэр, щIыдагъэ къыщыщIаш полигоным къыщызэрагъэпэща егъэджэныгъэхэр, ТекIуэныгъэ Иныр илъэс 80 щрикъум ирихьэлIэу Новый Уренгой къыщызэIуаха «Арктикэр мафIае илъэсхэм» гъэлъэгъуэныгъэри и нэгу щIэкIа нэгъуэщI Iуэхугъуэхэри.
КъыжыIапхъэщ ар Ренат и япэ ехъулIэныгъэу зэрыщымытыр. И ныбжькIэ щIалэ дыдэми, еджакIуэ акъылыфIэр нэхъапэми щытащ зыхэтхэм лъэныкъуэ куэдкIэ фIыкIэ къахэщу. КупщIафIэу, текIуэныгъэрэ ехъулIэныгъэ куэдкIэ гъэнщIауэ ирехьэкI абы школ илъэсхэр. Нартокъуэр ипэкIэ зыхэта зэпеуэхэм ящыщщ «Зарница» спорт зэпеуэр (гупым и пашэу), республикэм и щIыналъэхэм я лIыкIуэ гуп 13 зрихьэлIа «ХимикУм» акъыл зэхэдзэ джэгу-зэпеуэр. Ставрополь къалэм «Химие. Биологие» унэтIыныгъэмкIэ щекIуэкIа Кавказпсо проект школым и лэжьыгъэми, Налшык дэт «Антарес» егъэджэныгъэ центрым химиемрэ биологиемкIэ щыIа зэхуэсми, апхуэдэ нэгъуэщI зэхьэзэхуэхэми я утыку ихьащ ар. Зи цIэ къитIуа Iуэхугъуэхэм ящыщ дэтхэнэми Нартокъуэр жыджэру хэтащ, щIэныгъэ куурэ зэфIэкI лъагэрэ зэрыбгъэдэлъыр наIуэ къищIу. Мы гъэм и мэкъуауэгъуэ мазэм Ренат хэтынущ «Антарес»-м медицинэмкIэ къыщызэрагъэпэщыну еджэныгъэхэм.
ЖыпIэнурамэ, Нартокъуэ Ренат Къэсейхьэблэ дэт курыт школыр зэрыпагэ и гъэсэнхэм, ди республикэр зэрыгушхуэ ныбжьыщIэхэм ящыщщ. АтIэми еджакIуэм зыIэригъэхьэ сыт хуэдэ ехъулIэныгъэми и щIыбагъ къыдэлъщ абы и егъэджакIуэхэм, унэтIакIуэхэм, гъэсакIуэхэм я лэжьыгъэшхуэ. Ренат и дежкIэ апхуэдэхэм ящыщщ и класс унафэщI Тумэ Ланэ, химиемкIэ и егъэджакIуэ Хъупсырджэн Лянэ сымэ, нэгъуэщIхэри. Абыхэми щIэныгъэ куум и лъагъуэм тезышэ адрей и егъэджакIуэхэми фIыщIэ ин яхуещI щIалэщIэм, зыIэригъэхьа ехъулIэныгъэхэм ябыхэм я гуащIэшхуэ зэрыхэлъыр къигъэлъагъуэу.
Сабийм и зэхэщIыкIым, акъылым зиужьыным, шэч хэмылъу, увыпIэшхуэ щиIэщ ар къызыхэкIа унагъуэм илъ хабзэхэм. Ренат и адэ-анэ Нартокъуэхэ Хьэсэнбийрэ Заремэрэ щIэныгъэ нэхъыщхьэ, IэщIагъэ дахэ зиIэ цIыхухэщ. ЩIэныгъэм пщIэ щыхуащI унагъуэм я бын пажэ Рашид 11-нэ классыр мы гъэм къеух, дыщэ медаль къэзыхьыну хущIэкъухэм ящыщщ, школ нэужьым медицинэ IэщIагъэм хуеджэну и мурадщ. Быным я нэхъыщIэ хъыджэбз закъуэ Аминэ 7-нэ классым щIэсщ, фIы дыдэу йоджэ, хамэ къэралыбзэхэм дехьэх, зэдзэкIакIуэ IэщIагъэ зригъэгъуэтыну хуейщ. Зи гугъу фхуэтщIа Ренат финанс Iуэхухэм нэхъ куууэ хуеджэнри и хъуэпсапIэхэм ящыщщ.
ЛъагапIэщIэхэр зи плъапIэ зэдэлъхузэшыпхъухэу Нартокъуэхэ Рашид, Ренат, Аминэ сымэ, апхуэдэуи къэкIуэнур зей ныбжьыщIэ зэчиифIэ псоми ди гуапэу дохъуэхъу еджэным щызыIэрагъэхьэ ехъулIэныгъэхэр гъащIэм лъэ быдэкIэ зэрыхэувэфын IэмалыфI яхуэхъуну. Ди лъахэ дахэр, къэрал иныр зэрыгушхуэ IэщIагъэлI къахэкIыну, я гумрэ я псэмрэ зыхуэпабгъэ щIэныгъэм и щыгум ахэр нэсыну ди гуапэщ.
