Блий Iэюб ирагъэблагъэ

КъБР-м СпортымкIэ и министерствэм щрагъэблэгъащ Венгрием дзюдомкIэ щекIуэкIа дунейпсо чемпионатым ещанэ увыпIэр къыщызыхьа Блий Iэюб. Спортсмен ныбжьыщIэм IущIащ КъБР-м ДзюдомкIэ и федерацэм и унафэщI Емкъуж Мухьэмэд, Олим джэгухэм я призер, УФ-м щIыхь зиIэ и тренер Тау Хьэсэнбий, КъБР-м спортымкIэ и министрым и къуэдзэ Хэжь Заур, УФ-м щIыхь зиIэ и тренер Ныр Сеф и цIэр зезыхьэ спорт еджапIэм и унафэщI Тау Сэфарбий сымэ. 
Тхьэмахуэ ипэкIэ Будапешт щекIуэкIа чемпионатым щытепсэлъыхьым Блийм къыхигъэщащ апхуэдэ зэхьэзэхуэхэр сыт щыгъуи гугъуу зэрыщытыр. «Махуэ къэс, зэрыжаIэу, телъыджэ гуэрхэр абы къыщохъу: командэхэм щыпашэхэр, олимп чемпионхэр хагъащIэ икIи адрей зэIущIэхэм елъытауэ зэныкъуэкъур щынэхъыбэщ», - жиIащ абы. 
Тау Хьэсэнбий къыщыпсалъэм къыхигъэщащ Блийр дзюдом зэрыхыхьэрэ абы зэрыкIэлъыплъыр икIи зэчий зэрыдилъэгъуар. Абы и псалъэм пэджэжу Тау Сэфарбии жиIащ Iэюб щIалэгъуалэм щапхъэ зэрахуэхъур, ныбжьыщIэ цIыкIухэр абы зэрыдэплъейр.
ЗэIущIэм хэтахэр тепсэлъыхьащ дзюдом зегъэужьынымкIэ республикэм щыIэ Iэмалхэм, зэрызагъасэ щIыкIэхэм, нэгъуэщIхэми.
«Ди спортсменхэм я зэфIэкIхэмрэ ехъулIэныгъэхэмрэ ди щIалэгъуалэр нэхъыбэжым трагъэгушхуэ, уеблэмэ секцэхэм къакIуэхэм я бжыгъэм хохъуэ. Ар икъукIэ дызыгъэгушхуэщ. Спортсменым дэIэпыкъуфын, спорт лъагапIэхэм ахэр нэзыгъэсыфын тренер лъэщхэри диIэщ», - жиIащ Хэжь Заур. 
Фигу къэдгъэкIыжынщи, Блий Iэюб УФ-м и чемпион нэгъабэ хъуащ, абы ипэ илъэсхэм дыжьынрэ домбеякърэ къихьащ, Европэм етIуанэ щыхъуащ. Щыбанэр килограмм 60 зи хьэлъагъхэм я дежщ, и тренерыр Гъэунэ Анзорщ.