Шууейхэм гъуэгуанэ кIыхь зэпач

Къэбэрдей-Балъкъэрым и шууей гупым иджыблагъэ зэпачащ Зеикъуэ – Джылысу - Налшык турист лъагъуэхэр. Iуэхугъуэ щхьэпэр къызэрагъэпэщащ КъБР-м Курортхэмрэ туризмэмкIэ и министерствэмрэ Бахъсэн къалэ администрацэмрэ, и къалэн нэхъыщхьэуи щытар щIыналъэм туризмэм зыщегъэужьынымрэ адыгэшым и зэфIэкIхэр хэIущIыIу щIынымрэщ. 
Апхуэдэуи гъуэгуанэ кIыхьыр шыхэмкIэ зэпычыныр хуэунэтIауэ щытащ Абхъазым и щхьэхуитыныгъэм и махуэр гъэлъэпIэнымрэ КъБР-м и Япэ Президент КIуэкIуэ Валерэ и цIэкIэ ягъэджэгу Кубокыр къэхьыным теухуауэ ирагъэкIуэкI дунейпсо зэхьэзэхуэмрэ захуэгъэхьэзырынырщ. 
МахуихкIэ гъуэгуанэм тета шууей 17-м яхэтащ КъБР-м курортхэмрэ туризмэмкIэ и министр Быф Аскэр, Бахъсэн къалэ администрацэм и унафэщI Мамхэгъ Хьэчим, УФ-м Iэпщэрыбанэ спортымкIэ щIыхь зиIэ и мастер, UFC-м и зэуакIуэ Мырзэкъан Азэмэт, УФ-м Iэпщэрыбанэ спортымкIэ щIыхь зиIэ и тренер Мамхэгъ Iэдэм, УФ-м бэнэкIэ хуитымкIэ щIыхь зиIэ и тренер Тембот Анзор сымэ, УФ-м и МВД-мрэ СК-мрэ я къудамэу республикэм щыIэхэм я лэжьакIуэхэр, адыгэшыр фIыуэ зылъагъухэр, нэгъуэщIхэри. 
Шууейхэм еплIанэ махуэм къаIущIащ Къэбэрдей-Балъкъэрым и артист цIэрыIуэхэу Зеущэ Iэуес, БешкIур Ислъам, Мэремыкъуэ Резуан, Мамий Аслъэн, Къуэдз Залым, Шыхъуэбахъуэ Ислъам сымэ икIи я уэрэд дахэхэмкIэ я «гъуэгум пкIэлъей ирадзащ». 
«Къэралым и политикэм лъабжьэ хуэхъуу, УФ-м и щэнхабзэ, хабзэ, щыIэкIэ-псэукIэхэр егъэфIэкIуэнымрэ гъэбыдэнымрэ хуэунэтIауэ Урысей Федерацэм и Президент Путин Владимир ищIа унафэм ипкъ иткIэ мыпхуэдэ Iуэхугъуэхэр, ди хабзэмрэ щэнхабзэмрэ пыщIахэр, щIэх-щIэхыурэ идогъэкIуэкI. Иджырей зэманым абы мыхьэнэшхуэ иIэщ икIи адэкIэ абы пытщэнущ», – жиIащ Бахъсэн къалэ администрацэм и унафэщI Мамхэгъ Хьэчим.