Багъ Идар дунейпсо зэхьэзэхуэм макIуэ

«Presidents Cup - Pan Am (G3)» фIэщыгъэр зэрихьэу фокIадэм и 4 - 7-хэм Перум и къалащхьэ Лимэ щекIуэкIащ тхэквондомкIэ (ВТФ, Олимп джэгухэм хыхьэ лIэужьыгъуэмкIэ) дунейпсо чемпионатым ягъэкIуэнухэр къызэрыхах, рейтинг баллхэр къыщахь дунейпсо зэхьэзэхуэ. Абы щызэпеуащ къэрал куэдым я спортсмен 500-м нэблагъэ.

Урысей Федерацэм и командэ къыхэхам хэту абы щызэуащ Къэбэрдей-Балъкъэрым и «Пять колец» спорт академием и гъэсэн Багъ Идар икIи килограмм 63-рэ зи хьэлъагъхэм я деж дыжьын медаль къыщихьащ. Ди щIалэм зэIущIитху иригъэкIуэкIати, плIым щытекIуащ, ауэ, ди жагъуэ зэрыхъущи, кIэух зэхьэзэхуэр Бразилием и тхэквондист Эдуардэ Бареттэ иригъэхьри, етIуанэ хъуащ. 
Апхуэдэуи, иджырей зэпеуэр мы гъэм жэпуэгъуэм тхэквондомкIэ екIуэкIыну дунейпсо чемпионатым зэрызыхуагъэхьэзыр зэIущIэхэм хыхьэу щытащ. Ди къэралми республикэми я щIыхьыр яIэту абы хэтынущ Багъ Идаррэ Бекъул Миланэрэ. ЖыпIэнурамэ, Къэбэрдей-Балъкъэрым и лIыкIуэу УФ-м и командэ къыхэхам цIыхуитI къызэрыщыгъэлъэгъуар щIыхь зыпылъщ икIи тхэквондом зыужьыныгъэфI ди щIыналъэм зэрыщигъуэтам и щыхьэтщ.
Фигу къэдгъэкIыжынщи, «Multi European Games 2025» фIэщыгъэр зэрихьэу шыщхьэуIум и 28 - 31-хэм Сербием и Ниш къалэм щекIуэкIа, рейтинг баллхэр щат дунейпсо зэхьэзэхуэм Багъ Идар япэ увыпIэр къыщихьауэ щытащ. 
Багъ Идаррэ Бекъул Миланэрэ ядэлажьэр УФ-м щIыхь зиIэ и тренер Ахъмэт Амирщ.