Спорт хъыбархэр

Зы дыщэрэ домбеякърэ

Урысей Федерацэм атлетикэ хьэлъэмкIэ пашэныгъэр къыщыхьыным хуэунэтIа зэхьэзэхуэ махуибгъукIэ щекIуэкIащ Иркутск къалэм и «Байкал-Арена» спорт комплексым. ТекIуэныгъэ Иныр мы гъэм илъэс 80, Урысейм атлетикэ хьэлъэ спорт лIэужьыгъуэр къызэрыщызэрагъэпэщрэ илъэси 140-рэ зэрырикъухэм теухуауэ щытащ ар. Абы щызэпеуащ УФ-м и щIыналъэхэм ящыщу 54-м я спортсмен, щIалэхэри хъыджэбзхэри зэхэту, 500-м щIигъу, я ныбжькIэ илъэс 15 - 20-хэм щIимыгъуауэ.

Ди гуапэ зэрыхъущи, Къэбэрдей-Балъкъэрым и лIыкIуэхэм ящыщу и хьэлъагъ елъытауэ зыхэта гупым япэ увыпIэр къыщихьащ УФ-м спортымкIэ и мастер Скрипко Аланэ (кг 76-рэ). Ди лъахэгъу пщащэм, бгъэдыхьэгъуитIым зэхэту къиIэтащ килограмм 202-рэ зи хьэлъагъ штангэр: рывокымкIэ - 92-рэ, толчокымкIэ - 110-рэ.

ЦIыхухъухэм я зэпеуэм, килограмми 109-рэ зи хьэлъагъхэм я деж, ещанэ увыпIэр къыщихьащ УФ-м спортымкIэ и мастер Ширдий Ислъам: бгъэдыхьэгъуитIым абы къиIэтащ килограмм 323-рэ зи хьэлъагъ штангэр: рывокымкIэ килограмми 145-рэ, толчокымкIэ килограмми 178-рэ.

Ди спортсменхэр зыгъасэр УФ-м щIыхь зиIэ и тренер Шэкэм Михаилщ.

Денизэ псоми ятокIуэ

Налшык къалэм и «Гладиатор» спорт комплексым щекIуэкIащ щIыналъэхэм стIолыщхьэ теннисымкIэ я зэхьэзэхуэ. Абы щызэпеуащ КИФЩI-м и щIыналъэхэм ящыщу 5-м, Краснодар крайм, Адыгейм я спортсмен 50-м щIигъу, я ныбжькIэ илъэс 14 ирикъуахэмрэ нэхъыщIэхэмрэ.

Ди гуапэ зэрыхъущи, зэхьэзэхуэм япэ увыпIэр щиубыдащ ди республикэм щыщ спортсменкэ, Хъыдзэдж Беллэ и гъэсэн Къуэдз Денизэ.