Ди ныбжьыщIэхэр нэхъ лъэщщ

Ставрополь крайм хыхьэ Минводы къалэм и «Минводы ­ЭКСПО» гъэлъэгъуэныгъэ центрым ще­кIуэ­кIащ «Къалэхэм я зэхэуэ. Кавказ» фIэщыгъэр зэрихьэу дзюдомкIэ урысейпсо зэхьэзэхуэ. Абы щызэпеуащ Кавказ Ищхъэрэм и щIыналъэхэм я командэхэр, гуп къэс цIыху 13 хъууэ, я ныбжькIэ илъэс 15 - 17-м щIимыгъуауэ. 

Зэхьэзэхуэм кърикIуахэр зэхалъхьэжа нэужь япэ увыпIэр иратащ Къэбэрдей-Балъкъэрым и командэм, етIуа­нэр Ингушым, ещанэр Ставрополь крайм я гупхэм. 
Республикэм и щIыхьыр зэхьэзэхуэм лъагэу щаIэтащ Къуэны­къуей Идар, Унэж Темырлан, Теммоев Алан, Быгуэ Мансур, Къамбий Сэфарбий, Хъуран Къантемыр, Бондаренкэ Николай, БищIо Атхъан, Iэпыч Мухьэмэд, Шыкъ Эльнур, Мамий Атмир, Кастахов Марат сымэ. 
Зэхьэзэхуэм япэ увыпIищыр къыщызыхьа командэхэр хэтынущ мы гъэм дыгъэгъазэм и 15-м Сочэ къалэм щекIуэкIыну урысей­псо кIэух зэпеуэм. 
Ди командэм дэлажьэр Джэданэ Залым, Дзухэ Бес­лъэнрэ Залымрэ, Куп Эдуард, Махуэ Олег сымэщ. 
«Мыпхуэдэ зэхьэзэхуэ ин Ставрополь щIыналъэм япэу щедгъэкIуэкIыу аращ, адрей спорт лIэужьыгъуэхэмкIэ зэхэтшэ зэпыту щытми. Дзюдом дихьэххэр ди щIыналъэм щыкуэдщ, жыпIэну­рамэ, нобэ абы зыхуагъасэ цIыху минищым щIигъум. Ставрополь щIыналъэм и командэр ди къэралым щынэхъ лъэщхэм сыт щы­гъуи яхэтщ, иджырей зэIущIэри абы и щыхьэтщ.
Зэхьэзэхуэм къыщыхэжаныкIахэм Ставрополь крайм и Iэтащхьэ Владимиров Владимир къыбгъэдэкIыу гуапэу ­сохъуэхъу адэкIи ехъулIэныгъэфIхэр яIэну, я зэфIэкIхэм ­хагъэхъуэну», - яжриIащ журналистхэм Ставрополь крайм и Правительствэм и УнафэщIым и къуэдзэ, 2012 гъэм екIуэкIа Олимп джэгухэм дзюдомкIэ ещанэ увыпIэр къыщызыхьа, УФ-м, Европэм, дуней псом я чемпион, УФ-м спортымкIэ щIыхь зиIэ и мастер Нифонтов Иван.