КъарууфIэщ икIи губзыгъэщ

ЩэкIуэгъуэм и 12-м Налшык къалэм дэт сабий сад №61м щекIуэкIащ Iуэху гъэщIэгъуэн. Абы и гъэсакIуэ, логопед Нэгъуей Лерэ и гъэсэн гупыр щIыгъуу къызэригъэпэщат «Олимп джэгу цIыкIухэр - 2025» зыфIища теплъэгъуэр. 
Абы хэтащ садым и унафэщI Ержыб Марианнэ, дзюдомкIэ гъэсакIуэ Тау Азэмэт, нэгъуэщIхэри. 
Зэпеуэр къызэIуахащ къэралымрэ Къэбэрдей-Балъкъэрымрэ я гимнхэмкIэ. ИтIанэ «олимп мафIэр» къахьри, жьэгур зэщIагъэнащ, хабзэр къызэпамыуду, ныбжьэгъугъэр я гъуазэу, хьэрэмагъ хэмылъу зэпеуэну псалъэ ятащ. ЦIыкIухэр тепсэлъыхьащ олимп джэгухэр зищIысымрэ и хабзэхэмрэ, абы и ныпым тет хъуреитхум къикIым. НыбжьыщIэхэр зэпеуащ гимнастикэмкIэ, фитнесымкIэ, спорт къафэмкIэ, хьэлъэ къэIэтынымкIэ, дзюдомкIэ. 
Абы къыкIэлъыкIуэу адэ-анэхэми къагъэлъэгъуащ я зэфIэкIыр: лъакъуэрыгъажэм (самокат) зэрытетыфыр, футбол зэрыджэгуфыр, боксым зэрыхуэIэзэр. Зэрыакъыл жанхэри къапщытащ «Къару иIэщ, акъылыр сыту ищIын?!» жыхуиIэм хуэдэ мыхъун папщIэ. 
Зэпеуэм кърагъэблэгъа Тау Азэмэт цIыкIухэм ехъуэхъуащ икIи яхутепсэлъыхьащ дзюдом и хабзэхэм, абы къыщагъэсэбэп хамэбзэм щыщ псалъэхэм къарыкIхэм. 
Гупым и гъэсакIуэ Нэгъуей Лерэ зэрыжиIамкIэ, ахэр мыгувэу хэтынущ къалэ спартакиадэм. Абы зэрыхуэхьэзырыр щагъэлъэгъуа зэпеуэщ зи гугъу тщIар.