Спорт зэпеуэхэр

ЛIыхъужьым и щIыхькIэ

Совет Союзым и ЛIыхъужь Къуэш Алий и фэеплъу панкратионымкIэ урысейпсо зэхьэзэхуэ Мейкъуапэ къалэм щекIуэкIащ. Абы щызэпеуащ ди къэралым и щIыналъэхэм я спортсмен 700-м нэблагъэ.

Къэбэрдей-Балъкъэрым и командэм хъарзынэу зэхьэзэхуэм зыкъыщигъэлъэгъуащ икIи медаль 19 абы къыщихьащ: 9-р дыщэу, 5-р дыжьыну, 5-р домбеякъыу.

Я хьэлъагъ елъытауэ зыхэта гупхэм япэ увыпIэхэр щаубыдащ Алмэ Темырлан, Жамолов Аслъэн, Хьэлышх Идар, Мэкъуауэ Елдар, Колечкинэ Кирэ, ТеуныкI Мурат, Балъкъэр Борис сымэ.

Ди командэр зэхьэзэхуэм хуагъэхьэзыращ Мэш Алим, Щоджэн Артур, Шыхъуэстэн Руслан сымэ.

Псом щыщи къахь

«Локодзюдо» фIэщыгъэр зезыхьэ, сабийхэм дзюдомкIэ я лигэм хэт командэхэм иригъэкIуэкI зэхьэзэхуэм и къыкIэлъыкIуэ зэIущIэр Мэзкуу областым хыхьэ Одинцовэ къалэм и спорт комплексым щекIуэкIащ.

Къэбэрдей-Балъкъэрым и бэнакIуэ ныбжьыщIэхэм ящыщу я хьэлъагъ елъытауэ зыхэта гупхэм япэ увыпIэхэр абы къыщахьащ Къэжэр Самиррэ (кг 46-рэ) Мисиров Мансуррэ (кг 60). ЕтIуанэ хъуащ Срыкъуэ Ахьмэдрэ (кг 50) Шишхов Инверрэ (кг 46-рэ).

Ещанэ увыпIэхэр къахьащ Джафаров Инал (кг 38-рэ), Щокъуий Ренат (кг 42-рэ), Абазэ Самир (кг 46-рэ) сымэ.

ЩIалэхэр зэхьэзэхуэм хуагъэхьэзыращ Емкъуж Рустам, Джэданэ Залым, Мырзэбэч Iиляс, Шэджэм БетIал сымэ.

Зокаевым и фэеплъу

Налшык къалэм и «Гладиатор» спорт комплексым щекIуэкIащ зэзауэ зыхэт спорт лIэужьыгъуэхэмкIэ урысейпсо зэхьэзэхуэ. Ар и фэеплъу щытащ СССР-м бокс спорт лIэужьыгъуэмкIэ и мастер Зокаев Артур. Зэхьэзэхуэм хэтащ ди къэралым и щIыналъэхэм ящыщу 8-м я спортсмени 150-рэ.

Къэбэрдей-Балъкъэрым и гъэсэнхэм ящыщу я хьэлъагъ елъытауэ зыхэта гупхэм япэ увыпIэхэр къыщахьащ Хапаев Эмиль, Бозий Алихъан, Къущхьэ Саид сымэ.

ЕтIуанэ хъуахэщ Уэтэр Алихъанрэ Мисиров Камилрэ. Домбеякъ медалхэр къахьащ Мендикеев Имран, Индрей Мухьэмэд, Газаев Амир, Казаков Сэлихь сымэ.

Анэр ягъэлъапIэу

Налшык къалэм дэт «Каисса» клубым Анэхэм я махуэм ирихьэлIэу щекIуэкIащ шахмат псынщIэмкIэ республикэ зэхьэзэхуэ. Абы щызэпеуащ а джэгукIэ дахэм дихьэх ныбжьыщIэу, щIалэхэри хъыджэбзхэри зэхэту, 126-рэ.

Я ныбжьхэм, яIэ разрядхэм, рейтингым щаIыгъ увыпIэхэм елъытауэ зыхэта гупхэм щытекIуащ Мату Амир, КIэш Идар, Джангуразов Алий, Джэдгъэф Амалие, Къэгъэзэж Аскэр, Дудар Сэлим, Дадэ Залымхъан, Аджаматовэ Аидэ, Щоджэн Данияр, Сунш Дамир, Дербитов Георгий сымэ.

ЕтIуанэ увыпIэхэр къахьащ Струков Ярослав, Балъкъэр Дамир, Колоевэ Аринэ, ГъущIынэ Темыркъан, Щоджэн Аделинэ, Бабаев Алий, Баянов Алджэрий, Рехвиашвили Эллэ, Серков Владислав, Пузан Вячеслав, Щоджэн Рэхьим сымэ.

Бесчокъуэ Щыхьмырзэ, Амщокъуэ Ибрэхьим, Болэт Марк, Къэгъэзэж Санэ, Ерыстау Амирэ, Габаев Амир, ЗэкIуий Альберт, Кусаевэ Лилие, Елъкъэн Азэмэт, Афэ Амырхъан сымэ ещанэ хъуахэщ. 

Зэхьэзэхуэм къыщыхэжаныкIахэм медалхэр, кубокхэр, щIыхь тхылъхэр иратащ.

Бахъсэндэсхэр къыхожаныкI

«Гимнастикэм и лигэ» фIэщыгъэр зэрихьэу  Мэзкуу къалэм и «ВТБ-Арена» спорт комплексым щекIуэкIа зэхьэзэхуэм къыщыхэжаныкIащ Бахъсэн къалэм и спортсмен ныбжьыщIэхэр. Зэпеуэм щыIащ ди къэралым и щIыналъэхэм ящыщ куэдым я спортсмену 2000-м щIигъу, псори зэхэту командэ 20 хъууэ.

Къэбэрдей-Балъкъэрым и щIыхьыр яIэту зэхьэзэхуэм хэтащ Бахъсэн къалэм и спорт еджапIэм и гъэсэнхэу Артюхов Богданрэ Къэжэр Амиррэ икIи гупхэм я зэпеуэм етIуанэ увыпIэр къыщахьащ. Япэ увыпIэр Санкт-Петербург къалэм и гимнаст ныбжьыщIэхэм яубыдащ.

Ди спортсменхэм ядэлажьэр Апатьевхэ Дмитрийрэ Маринэрэщ.