ЕтIанэгъэ зэлэжьыну гъуэгухэр

«ГъащIэм хуэщIа инфраструктурэ» лъэпкъ пэхуэщIэм ипкъ иткIэ 2026 гъэм автомобиль гъуэгухэр къызыхуэтыншэу щызэрагъэпэщыжынущ республикэм и щIыпIэ куэдым. Лэжьыгъэхэр щрагъэкIуэкIынущ къуажэ пхыдзахэми, Налшык къалэм и уэрамхэми, щIыналъэм кIуэцIрыкI, къэрал мыхьэнэ зиIэ гъуэгухэми. Абы къызэщIрагъэубыдэнущ республикэм и гъуэгу сетым хыхьэу объекти 10, псоми зэхэту километр 73-рэ я кIыхьагъыу, лъэмыжитIи абы хэтыжу.

Къару нэхъыбэ зрахьэлIэну IэнатIэм хохьэ щIыналъищыр - Ставрополь крайр, Къэбэрдей-Балъкъэрыр, Осетие Ищхъэрэ – Аланиер - зэпызыщIэ Новопавловск – Прохладнэ – Мэздэгу автомобиль гъуэгур. Мыбдежым лэжьыгъэхэр 2025 гъэм щрагъэжьащ икIи етIанэгъи абыхэм пащэнущ. Къызыхуэтыншэу мыбдеж щызэрагъэпэщыжыну гъуэгум псори зэхэту километри 7 и кIыхьагъ хъунущ.

Апхуэдэуи щыIэ мардэм кърагъэтIэсэнущ Чернэ Речкэ, Благовещенкэ къуажэхэр зэпызыщIэ, километр 12,7-рэ зи кIыхьагъ гъуэгур, Малкэрэ Ингушлимрэ я зэхуакум дэт Чыщбалъкъ къуажэм и уэрам нэхъыщхьэр.

Мыдрейуэ, гъуэгум и лэжьакIуэхэм жаIащ, лъэпкъ пэхуэщIэм ипкъ иткIэ, щIыналъэ бюджетым къыхэкIа мылъкукIэ, дызэрыт илъэсым къриубыдэу объект 28-м, псори зэхэту километр 60 хъум, лэжьыгъэшхуэхэр мы гъэм зэрыщрагъэкIуэкIар. Абыхэм хохьэ Новопавловск – Прохладнэ – Мэздэгу, Малкэ – Ингушли, Александровскэ – Уэзрэдж, Налшык – Май автомобиль гъуэгухэм я Iыхьэхэр.

Тэрч щIыналъэм къызыхуэтыншэу щызэрагъэпэщыжащ Тэрч псым телъа лъэмыжыр, Курп Ищхъэрэмрэ Ипщэмрэ хуэкIуэ гъуэгухэр. Аруан, Шэджэм районхэм я объект зыбжани апхуэдэу къагъэщIэрэщIэжащ, Каменкэ къуажэм къыпекIуэкIыу иджыблагъэ яухуа автомобиль гъуэгумрэ лъэмыжибгъумрэ яхэту.

Iуащхьэмахуэ районым и Нейтринэ обсерваторием хуэкIуэ, Бахъсэн – Къэрэгъэш, Куба – Псыхъурей – Кременчуг-Константиновскэ автомобиль гъуэгухэри зыхуей хуагъэзащ.

ИрагъэкIуэкIа лэжьыгъэхэм я фIыгъэкIэ цIыхухэм я шынагъуэншагъэмрэ тыншыпIэмрэ къызэгъэпэща хъуащ, жаIащ гъуэгуухуэхэм.