Спорт хъыбархэр

КъБР-м щыяпэу

Къэбэрдей-Балъкъэрым и спорт тхыдэм щыяпэу Налшык къалэм и «Гладиатор» комплексым щрагъэкIуэкIащ дартсымкIэ КъБР-м и чемпионатрэ пашэныгъэр къыщыхьыным хуэунэтIа зэхьэзэхуэрэ. Абы щызэпеуащ ди республикэм и щIыналъэхэм я спортсмену, щIалэхэри хъыджэбзхэри зэхэту, 100-м нэблагъэ.

ГъэщIэгъуэну икIи удэзыхьэхыу екIуэкIа зэхьэзэхуэхэм япэ увыпIэхэр къыщахьащ Гъубж Умар, Бэдракъ Идар, Уэркъуасэ Альбинэ, Щомахуэ Аслъэнбэч, Мэкъуауэ Силинэ, Гъубж БетIал, Урысбий Миленэ, Романовская Юлие сымэ.

Апхуэдэуи, зэпеуэхэм къарикIуахэр зэхалъхьэжа нэужь, КъБР-м и командэ къыхэхам хэгъэхьэнухэр наIуэ абы къыщащIащ икIи ахэр хэтынущ КИФЩI-м и чемпионатымрэ пашэныгъэр къыщыхьыным хуэунэтIауэ етIанэгъэ гъатхэпэм ирагъэкIуэкIыну зэIущIэхэм.

Къэзан къыщыхожаныкI

Ди къэралым и студентхэм дзюдомкIэ я урысейпсо зэхьэзэхуэу Къэзан къалэм иджыблагъэ щекIуэкIам къыщыхэжаныкIащ ди республикэм и бэнакIуэхэр.

Килограмм 60 зи хьэлъагъхэм я деж Байрамкулов Алим етIуанэ увыпIэр къыщихьащ, КIуж Къантемыррэ (кг 73-рэ) Мырзэбэч Iилясрэ (кг 100) ещанэ хъуахэщ.

КИФЩI-м и чемпионатым

Налшык къалэм и «Гладиатор» спорт комплексым щекIуэкIащ КИФЩI-м мас-рестлингымкIэ и 3-нэ чемпионатрэ пашэныгъэр къыщыхьыным хуэунэтIа зэхьэзэхуэрэ.

Абы щызэпеуащ Къэбэрдей-Балъкъэрымрэ Осетие Ищхъэрэ – Аланиемрэ я спортсмену 100-м нэблагъэ. Ди республикэм и гъэсэнхэм дыщэ медалу 27-рэ зэпеуэм къыщахьащ икIи Iэмал ягъуэтащ 2026 гъэм гъатхэпэм УФ-м и чемпионату Якутск къалэм щекIуэкIынумрэ пашэныгъэр къэхьыным хуэунэтIауэ Чебоксары къалэм етIанэгъэ мэлыжьыхьым щызэхашэну зэIущIэмрэ я зэфIэкIхэр щагъэлъэгъуэну.