«Спартак-Налшыкыр» къызэхуосыж

Урысей Федерацэм футболымкIэ и етIуанэ лигэм и «Б» дивизионым и Япэ гупым мы гъэм щекIуэкIа зэхьэзэхуэм щы­кIуэцIрыхуа «Спартак-Налшыкым» 2026 гъэм щыIэну зэпеуэм пасэу зыхуэгъэхьэзы­-рын щIидзащ. Ар икIи гурыIуэ­гъуэщ - командэ пщыкIуплI зы­хэта зэныкъуэкъуныгъэм ди щIалэхэм яужь къыщинар зы гуп закъуэщ, адрей псори къайфIэкIащ. Иджы щытыкIэр гъэ­зэкIуэжыпхъэщ икIи Iуэхум ­нэхъ пасэу иужь ихьэхукIэ, дауи, нэхъыфIщ. 

Дыгъэгъазэм и кум Къэ­бэрдей-Балъкъэрым и къалащхьэм къыщызэхуэсыжа «Спартак-Налшыкым» и футболистхэм я щытыкIэмрэ узыншагъэмрэ ­къапщыта иужь, зыгъэсэныгъэхэм щIадзащ. Абыхэм куэду яхэтщ зыкIэлъыплъыну кърагъэблэгъахэри. Щхьэж и зэфIэ­кIыр иджыпстукIэ здынэсыр ­кърапщытэн папщIэ зэныбжьэгъугъэ зэIущIэхэри ирагъэкIуэ­кIащ.
ЯпэщIыкIэ, дыгъэгъазэм и 17-м, ЕсэнтIыгу къалэм «Спартак-Налшыкыр» щыдэджэгуащ Ставрополь крайм щекIуэкI зэ­хьэзэхуэм хэт «Динамо-СУОР»-м. Налшыкдэсхэм я фащэр ящыгъыу зэIущIэр ирагъэжьащ Къу­мыкъум, КIыщым, Ереминым, Исаевым, Кенжевым, Блийм, ХьэцIыкIум, Пекъум, Мызэушым, Урысым, Ибрэхьимым.
Джэгум и пэщIэдзэм налшыкдэсхэм Iэмал гъуэзэджэ яIащ бжыгъэр къызэIуахыну. Ар­щхьэ­кIэ ХьэцIыкIу Амур игъэзэщIа ­пенальтир къехъулIакъым - я хьэрхуэрэгъухэм я гъуащхьэтетым топым къригъэгъэзащ. Абы щыгъуэми, «Динамо-СУОР»-м апхуэдэ Iэмал къыщыхукъуэ­кIым, къигъэсэбэпащ. Ар къы­щыхъуар 42-нэ дакъикъэращ. 
Загъэпсэхуу къихьэжа иужь зэпэщIэт командэхэм я футболист зыбжанэ яхъуэжащ, псоми якIэлъыплъыфын хуэдэу. Иджы налшыкдэсхэм яхэтт Каркае­-выр, Заниловыр, Жабоевыр, Алю­шиныр, ГъущIор, Дзыгулыр, Косован, ПщыхьэщIэр, Черкесовыр, Уваровыр, Лафыщыр.
Джэгум зэрыщIадзэжу, «Спар­так-Налшыкым» бжыгъэр зэ­хуэдэ ищIыжащ. ЗыкIэлъып­лъыну кърагъэблэгъа Уваров ­Валентинщ ар зыхузэфIэкIар. 
Аргуэру дакъикъэ зыбгъупщI дэкIри, ди щIалэхэр япэ ищащ. Налшыкдэсхэм метр пщыкIузым и деж щыту аргуэру Iэмал къащыхукъуэкIым, ар Черкесов Iэ­дэм дзыхь хуащIащ икIи щыуа­къым. Арати, 2:1-уэ текIуауэ «Спар­так-Налшыкым» и япэ зэ­ныбжьэгъугъэ зэIущIэр кърихьэлIащ.
Тхьэмахуэ дэкIри, ди щIалэхэр аргуэру джэгупIэ губгъуэм къихьащ. Налшык и «Спартак» стадионым ахэр щаIущIащ зи ­ныбжьыр илъэс 27-м щIимы­гъуахэр зыхэт Къэбэрдей-Балъкъэрым и командэ къыхэхам. Абы топджэгур зи IэщIагъэхэр хэпщIыкIыу щынэхъыфIащ. Лысенкэ Сослъэн (тIэунейрэ), Хьэ­шыр Алан, зыкIэлъыплъыну ­кърагъэблэгъа Урысым дагъэ­-кIа топиплIым жэуап я хьэрхуэ­рэгъухэм къратыфакъым икIи «Спартак-Налшыкыр» 4:0-у те­кIуащ. 
Мы зэIущIэм иужь топджэгум дихьэххэм Iэмал яIащ ди ко­мандэм и унафэщIхэм зыхуа­гъазэу, я Iуэху зытетыр зрагъэщIэну. Иджы «Спартак-Налшыкыр» пIалъэ кIэщIкIэ зэбг­рагъэкIыжащ, ИлъэсыщIэр я унагъуэхэм дэщIыгъуу кърагъэ­хьэфын хуэдэу. Мыгувэу къы­зэхуэсыжынурэ зыгъэ­сэны­гъэ­хэм пащэнущ.