БэнакIуэ цIэрыIуэхэр кърагъэблагъэ

Олимп джэгухэм бэнэкIэ хуитымкIэ я чемпион Сидаков ­Заурбэч, дунейпсо чемпионатым къыщыхэжаныкIа Шэрий Иналбэч, УФ-м спортымкIэ и мастер Хадарцев Алик сымэ Кэнжэ къуажэм дэт «Вымпел» спорт комплексым мастер-классхэр щрагъэкIуэкIащ япэ лъэбакъуэхэр спортым хэзычэ бэнакIуэ ныбжьыщIэхэм пап­щIэ. 

Жэрдэмыр къыхэзылъхьар КъБР-м БэнэкIэ лIэужьыгъуэ­хэмкIэ и федерацэмрэ «Пять ­колец» спорт академиемрэщ.
«Нэхъ лъэщ ухъуну ухуеймэ, ­нэхъ лъэщхэм я гъусэу зыгъасэ, жаIэ. Абы къыхэкIыу, ди сабийхэм я сэбэп зыхэтлъагъуэ сыт хуэдэ Iуэхури къызыдогъэпэщ. Узыдэплъеин, щапхъэ къызытеп­хын бэнакIуэхэр диIэщ, ауэ спорт утыкухэм нобэ щыпэрытхэм я ­гъусэу загъэсэну апхуэдэ Iэмалхэр ди сабийхэм епта иужь, я лъэр нэхъри жан мэхъу.
НыбжьыщIэ цIыкIухэм папщIэ, семинар едгъэкIуэкIыну къы­хэтлъхьащ, спортым ахэр дедгъэхьэхын, ягухэр къызэщIэдгъэнэн, текIуэныгъэ ­инхэм тедгъэгушхуэн мурадкIэ», - жиIащ УФ-м щIыхь зиIэ и тренер, «Пять колец» спорт академием и уна­фэщI, КъБР-м и Парламентым и депутат Ахъмэт Амир. 
Зэхьэзэхуэм кърихьэлIахэм яхэтащ УФ-м ММА-мкIэ спортым и мастер Сумаев Ислъам икIи Олимп джэгухэм я чемпионым и бэнэкIэм кIэлъыплъащ, абы и ­Iэмал гуэрхэми зыщигъэгъуэзащ. «Сэ сфIэ­хьэ­лэмэтщ абы и хьэл-щэныр, бэнэкIэр, утыку итыкIэр. ИкIи абы и сэбэпынагъ куэд къызэкIыну, лъагапIэщIэхэм сытригъэгуш­хуэну, къару нэхъыбэ къысхилъ­хьэну согугъэ», - жиIащ абы. 
Сидаков Заурбэч зыдэлэжьа щIалэ цIыкIухэм щхьэкIэ жиIащ абыхэм зэчий зэрабгъэдэлъыр, езым и бэнэкIэ Iэмал яригъэ­лъэгъуахэр псынщIэу къызэ­ра­пхъуэ­тар, зэрыгурыхуэхэр икIи зэрыжыджэрхэр. Къыхигъэщащ мыпхуэдэ зэхуэсхэми мы­хьэ­нэ­шхуэ зэраIэр.
«Тренерым ущигъасэм деж - ар зыщ, утыкум къихьэу нобэ банэ спортсменым и Iэмалхэр щыуигъэлъагъум деж - ар нэ­гъуэщIщ. Сабийм нэхъыфIу ар зыхещIэ икIи къепхъуатэ», - жи­Iащ Сидаков Заурбэч икIи гугъэ ищIащ, хабзэ хъууэ, мыпхуэдэ зэхуэсхэр илъэс къэс ирагъэ­кIуэкIыну.
ЗэIущIэм кърагъэблэгъащ  икIи щагъэпажащ тхэквондомкIэ Олимп джэгухэм хыхьэ лIэу­жьыгъуэмкIэ (ВТФ) УФ-м щэнейрэ и чемпионхэу, дунейпсо клас­сымкIэ спортым и мастерхэу ­Багъ Идаррэ Бекъул Миланэрэ. 
Фигу къэдгъэкIыжынщи, Багъыр Европэм и чемпион мы гъэм хъуащ, Бекъулыр - дунейпсо чемпионатым етIуанэ, абы къы­кIэлъыкIуэу екIуэкIа цIыхубзхэм я дунейпсо чемпионатым япэ увы­пIэхэр къыщихьащ. НэгъуэщI зэ­хьэзэхуэшхуэхэми мызэ-мытIэу тIури къыщыхэжаныкIащ. Абы­хэм ядэлажьэр Ахъмэт Амирщ.