ТIури домбеякъыу

Краснодар крайм щыIэ «Сириус» щIыналъэм щекIуэкIащ УФ-м тхэквондомкIэ (ИТФ – Олимп джэгухэм хэмыхьэ лIэужьыгъуэмкIэ) и чемпионатрэ пашэныгъэр къыщыхьыным хуэунэтIа зэхьэзэхуэрэ. Абы щызэпеуащ спортсмен балигъхэри, щIалэгъуалэри, ныбжьыщIэхэри.

Къэбэрдей-Балъкъэрым и лIыкIуэхэм домбеякъ медалитI къыщахьащ зэхьэзэхуэхэм. Илъэс 14-15 зи ныбжь гупым я деж ещанэ щыхъуащ Реуцкая Лилианнэ (кг 40). Илъэс 16-17 хъухэм я дежи апхуэдэ ехъулIэныгъэ щызыIэригъэхьащ Алхенди Нэзар (кг 45-рэ).

Спортсменхэм я тренерыр Кан Юрэщ.

МедалиплI къахь

Кубаным и Кубокыр къэхьыным хуэунэтIауэ киокусинкаймкIэ урысейпсо зэхьэзэхуэ Краснодар къалэм щекIуэкIащ. Абы щызэпеуащ ди къэралым и щIыналъэхэм ящыщу 23-м я спортсмен 400-м щIигъу.

Къэбэрдей-Балъкъэрым и щIыхьыр яIэту зэхьэзэхуэм хэтащ КъБР-м СпортымкIэ и министерствэм Олимп джэгухэм хэмыхьэ спорт лIэужьыгъуэхэмкIэ и еджапIэм и гъэсэнхэр икIи ехъулIэныгъэфIхэр абы щызэIэрагъэхьащ.

Республикэм и каратист ныбжьыщIэхэм я хьэлъагърэ ныбжьрэ елъытауэ зыхэта гупхэм медалиплI къыщахьащ. Къэбгъэлъагъуэмэ, Романенкэ Максим япэ, Шыхъуэстэн Айдар етIуанэ хъуахэщ. Магомедов Данялрэ Романенкэ Иванрэ ещанэ увыпIэхэр яубыдащ.

Медалхэмрэ щIыхь тхылъхэмрэ къадэкIуэу, зэхьэзэхуэм нэхъыфIу къыщалъыта каратистхэм ахъшэ саугъэтхэри иратащ. А псом нэмыщI, Романенкэ Максим иджыри щхьэхуэу ягъэпажащ, зэIущIищ иригъэкIуэкIам техникэ лъэщхэр къызэрыщигъэлъэгъуам папщIэ.

Ди щIалэхэм ядэлажьэр Къармокъуэ Амурбэчщ.