Илъэс щэ ныкъуэ хуэбгъэфэщэнукъым

 Футбол

Иджыблагъэ, бадзэуэгъуэм и 2-м, и ныбжьыр илъэс 50 ирикъуащ балъкъэр футболист цIэрыIуэ, Къэзахъстаным и чемпион Гуртуев Владимир. Ар ди республикэм щекIуэкI зэхьэзэхуэхэм иджыпсту и судья нэхъыщхьэщ.

Гуртуев Солтан и къуэ Владимир Къыргъызым и Иссык-Куль областым 1971 гъэм къыщалъхуащ. Топ джэгун зыщригъэсари аращ.
Футболым цIэрыIуэ щыхъуар Къэзахъстанращ. 2000 гъэм «Спартак-Налшыкым» хагъэхьа щIалэщIэр Къумыкъу Виктор Кокшетау и «Есиль» командэм и тренер нэхъыщхьэу щагъэувым здишащ. КъыкIэлъыкIуэ илъэсым Нур-СулътIан и «Женис»-м хыхьащ икIи 2001 гъэм Къэзахъстаным и чемпион хъуащ. КъыкIэлъыкIуэ илъэсри хуэIеякъым икIи дыжьын медалыр зыIэригъэхьащ.
ИужькIэ «Атырау», «Тараз», «Энергетик», «Восток», «Окжетпес» командэхэм фIы дыдэу зыкъыщигъэлъэгъуащ. Псори зэхэту Къэзахъстаным зэIущIэ 230-рэ щригъэкIуэкIащ икIи я хьэрхуэрэгъухэм топ 43-рэ яхудигъэкIащ. Джэгун щыщигъэтам Гуртуев Владимир и ныбжьыр илъэс 37-м щIигъуат. ПщIэрэ щIыхьрэ уиIэу апхуэдизрэ утыку уитыфын папщIэ узыншагъэ быдэрэ зэфIэкI лъагэрэ убгъэдэлъын хуейщ.
- Илъэс пщIыкIутI ипэкIэ гъащIэр хуабжьу къыстехьэлъат: си анэр дунейм ехыжащ, унагъуэ Iуэхухэри зэIумыбз хъуат, - жеIэ Владимир. – Абы щыгъуэм Алыхьым селъэIуащ узыншагъэрэ зышыIэныгъэрэ къызитыну. Къытщхьэщытым ахэр къысхуищIащи, иджы сызэрелъэIур ди быныр къытхуихъумэну, абыхэм я насыпым къыпищэнырщ.
Гуртуев Владимир щIэх-щIэхыурэ щыплъагъунущ Къэбэрдей-Балъкъэрым футболымкIэ и судья нэхъыщхьэу. Игъэджэгухэм абы пщIэ къыхуащI зэпытщ, сыт щхьэкIэ жыпIэмэ, ящIэ нэфI-ней Iуэхум зэи зэрыхимылъхьэнур, захуагъэм тету зэIущIэр зэрыригъэкIуэкIынур.