Мырзэ Резуан аргуэру кубокыр къехь

Мэзкуу и «Спартак»-м и гъуащхьэхъумэныкъуэ Мырзэ Резуан «Париматч Премьер кубокыр» илъэс етIуанэ хъуауэ зыIэрегъэхьэ. Къэралым и зи чэзу чемпионатым щIадзэным и пэ къихуэу ар ирагъэкIуэкI. Нэгъабэ ди лъахэгъур зыхэт гупыр Катарым щытекIуащ, иджы Урысей Федерацэм и къалащхьэм щынэхъ лъэщащ.

Короновирус уз зэрыцIалэм и зэранкIэ мы гъэм «Париматч Премьер кубокым» и зэхьэзэхуэр Мэзкуу щекIуэкIащ. «Спартак»-м къищынэмыщIауэ, абы хэтащ Къэзан и «Рубин»-р, «Химки»-р, «Сочэр».
Бахъсэн къыщалъхуа икIи топ джэгуным зыщезыгъэса Мырзэ Резуан «Спартак»-м и зэIущIищми жыджэру хэтащ. Мэзкуудэсхэр абыхэм бжыгъэшхуэ защIэкIэ щытекIуащ. ЯпэщIыкIэ зэщхьу, 4:0-у, хагъэщIащ «Сочэмрэ» «Химки»-мрэ. Арати, псынщIэу, зы джэгугъуэ яIэжу, наIуэ хъуащ «Париматч Премьер кубокыр» ещанэу зэкIэлъхьэужьу зэраIэрыхьар (нэхъапэм 2019, 2020 гъэхэм Катарым къыщахьащ).
Апхуэдэу щыт пэтми, кIэух зэIущIэри зэщIэкъуауэ Мэзкуу и «Спартак»-м иригъэкIуэкIащ. Абыи ар бжыгъэшхуэкIэ щытекIуащ – иджы 5:1-уэ.
Фигу къэдгъэкIыжынщи, Мырзэ Резуан илъэс ещанэ хъуауэ «Спартак»-м хэтщ. Мы гъэм и пэщIэдзэм Мэзкуу областым и «Химки»-м бэджэнду иратати, фIы дыдэу зыкъызэригъэлъэгъуар къалъытэри, зрашэлIэщ. Абыхэм я тренерыщIэ Португалием къраша Руй Виторие Мырзэм бэкIэ къызэрыщыгугъым и щыхьэтщ джэгугъуэ зэман куэду къызэрыритыр. КъищынэмыщIауэ, Резуан ящыщщ Урысей Федерацэм и командэ къыхэхам ираджэхэми.