Чайковскэм и макъамэм щIэтрэ олимп бэракъ хужьыр зэрахьэу

 Японием и къалащхьэм нобэ къыщызэIуахащ илъэс ипэкIэ зэхэтын хуея XXXII Гъэмахуэ Олимп джэгухэр. Ар щыщыIэну пIалъэм ирихьэлIэу, коронавирус уз зэрыцIалэр хъийм икIати, адрей спорт зэхьэзэхуэ инхэми хуэдэу ягъэIэпхъуат, Iуэхур илъэскIэ тэмэмыжыну щыгугъыу. АрщхьэкIэ…

XXXII Гъэмахуэ Олимп джэгухэр зэхаублащ Ар адрейхэм куэдкIэ къащхьэщыкIынущ икIи мылъкукIэ фейдэ гуэр къахуихьыну ущыгугъ хъунукъым. Апхуэдэу щыт пэтми, къэрал 200-м щIигъум къикIа спортсмен мин 11 джэгухэр зэхаублащ Ар адрейхэм куэдкIэ къащхьэщыкIынущ икIи мылъкукIэ фейдэ гуэр къахуихьыну ущыгугъ хъунукъым. Апхуэдэу щыт пэтми, къэрал 200-м щIигъум къикIа спортсмен мин 1-м щхьэдэхым я хъуэпсапIэр къайхъулIащ. Ахэр хэтынущ дэтхэнэ зыми зэрысабийрэ и псэм щигъэфIэ Олимп джэгухэм. Бадзэуэгъуэм и 23-м щыщIэдзауэ шыщхьэуIум и 8 пщIондэ спорт лIэужьыгъуэ 50-кIэ екIуэкIыну зэпеуэхэм медаль 1079-м щыщIэбэнынущ, 339-р дыщэу. Олимп программэм япэу хагъэхьащ каратэр, бгым дэпщеиныр, серфингыр, скейтбордыр. КъищынэмыщIауэ, утыку къихьэнухэщ дзюдомкIэ, триатлонымкIэ, шабзэ гъэуэнымкIэ гуп зэпеуэхэр. Аргуэру кърагъэгъэзэжащ бейсболымрэ софтболымрэ, японхэр хуабжьу зэрыщIэлъэIуам къыхэкIыу.

Олимп джэгухэм спортсмен нэхъыбэ дыдэ зыгъакIуэр, сыт щыгъуи хуэдэу, США-рщ. Абы и щIыхьыр яхъумэнущ цIыху 613-м. Хэгъэрей японхэм зэхьэзэхуэхэм хагъэтынущ атлет 552-рэ.

Урысейм и олимп спортсменхэм «Russian Olympic Committee» (ROС) фIэщыгъэм, Дунейпсо Олимп Комитетым и бэракъ хужьымрэ гербымрэ щIэту зыкъагъэлъэгъуэнущ. Ар и Iэужьщ илъэситху ипэкIэ допингым зыхидза бэлыхьхэм. Ди къэралым икIа цIыху 335-м ящыщу хэт зэхьэзэхуэм щытекIуэми, хэкум и гимным и пIэкIэ къыхурагъэуэнур Чайковскэм и концерт №I-м и пэщIэдзэ Iыхьэращ.  

Хэгъэрейхэм къищынэмыщIауэ, Токио къыщызэIуаха Олимпиадэм еплъын къудей щхьэкIэ хамэ къэрал къикIхэр ягъэкIуэнукъым. Абыи мылъкукIэ хэщIыныгъэшхуэ къаритынущ къызэгъэпэщакIуэхэм. Зэпеуэхэм зэрыкIэлыплъынур телевизоррэ ИнтернеткIэщ. Ди къэралым ар дагъэлъагъуну хуитыныгъэ иратащ Япэ каналым, ВГТРК-м, «Матч ТВ»-м. АрщхьэкIэ Мэзкуурэ Токиорэ я зэманыр сыхьэтихкIэ зэрызэщхьэщыкIым къыхэкIыу жэщым сыхьэтищым щыщIэдзауэ телевизорым кIэрысын хуей хъунущ, занщIэу хъыбар къэпщIэну ухуеймэ.

Къэбэрдей-Балъкъэрым икIахэу Токио жыжьэм зыкъыщызыгъэлъэгъуэну лъагэу дэлъеинымкIэ дуней псом щынэхъ лъэщхэу Ласицкене (Кучинэ) Мариерэ Акименкэ Михаилрэ дэ дытемыпыIэжу дыкIэлъыплъынущ. Абыхэм Iэмал псори яIэщ олимп чемпион хъуауэ къагъэзэжыну.

БэнакIуэ лъэрызехьэхэу Адыгейм щыщ Асэкъал Рустамрэ балъкъэр щIалэ Мусукаев Исмэхьилрэ нэгъуэщI къэралхэм я щIыхьыр яхъумэнуми икъукIэ дадэщIынущ. Абыхэми дыщэр зыIэрагъэхьэфынущ. Къапщтэмэ, зи цIэкIэ банэ Узбекистаным Асэкъалым Азием и чемпион цIэр мызэ-мытIэу къыхуихьащ, дунейпсо зэпеуэхэми дыжьынрэ домбеякърэ IэщIэлъу къыщигъэзэжащ. Рустам и дежкIэ мыр япэ Олимпиадэкъым икIи и насып иджы текIуэну догугъэ. Хьэсэней къуажэм щыщ Мусукаевым иужь илъэсхэм зи щIыхьыр ихъумэр Венгриеращ икIи дунейпсо утыкум и щIыхьыр хэпщIыкIыу щиIэтащ.

Гъуэгу махуэ, Токио-2020! Зэман угъурсызым зэхаублами насыпрэ дэрэжэгъуэрэ куэду абы къытхудэкIуэну Тхьэм жиIэ.